Пераможца — “Будаўнік — ПМК-14”

У мінулую нядзелю прайшоў фінальны паядынак адкрытага кубка раёна па футболе, у якім сустракаліся галоўныя фаварыты спаборніцтваў — каманды “Райспажыўтаварыства” і “Будаўнік — ПМК-14”.

Гэта была другая сустрэча дзвюх лепшых каманд раёна ў гэтым сезоне. У першай, рашаючай гульні чэмпіянату раёна ўпэўненую перамогу заваявалі футбалісты “Райспажыўтаварыства”. Аднак у фінале кубка перамога была за камандай з будаўнічай арганізацыі.

Пачатак гульні і ўвесь першы тайм прайшлі з перавагай “Будаўніка — ПМК-14”. Дзякуючы сваім лідарам — Аляксандру Дайліду, Яўгену Рабцэвічу, Івану Вадап’яну і Вадзіму Пабудзею — каманда з будаўнічай арганізацыі аказвала сур’ёзны націск на вароты “Райспажыўтаварыства”. Менавіта футбалісты “Будаўніка — ПМК-14” у сярэдзіне першага тайма адкрылі лік. Пасля перадачы з левага фланга Яўгена Рабцэвіча мяч рыкашэтам ад нагі абаронцы “Райспажыўтаварыства” Юрыя Мелехаўца трапіў у сетку варот Сяргея Рабцэвіча.

Пасля гола футбалісты “Райспажыўтаварыства” спрабавалі адыграцца, аднак па-сапраўднаму галявых момантаў амаль не стварылі. Толькі аднойчы нападаючы намінальных гаспадароў Сяргей Савеня меў выдатны шанс   выраўняць лік, але мяч пасля яго ўдару праляцеў побач са штангай. І тут спрацавала галоўнае футбольнае правіла: не забіваеш ты, забіваюць табе. Калі да канца першай паловы гульні заставалася літаральна некалькі хвілін, паўабаронца “Будаўніка — ПМК-14” Іван Вадап’ян бліскучым ударам зрабіў лік 2:0 на карысць сваёй каманды.

У другім тайме сітуацыя на полі змянілася. Нешматлікія атакі “Будаўніка — ПМК-14” былі ўжо не такімі небяспечнымі. У сваю чаргу, футбалісты “Райспажыўтаварыства” захапілі ініцыятыву і на працягу другой паловы паядынку мелі шэраг выдатных шансаў, каб не толькі выраўняць лік, але і выйсці наперад. Аднак мяч ніяк не хацеў трапляць у вароты, якія абараняў Уладзімір Каркотка.

На апошняй хвіліне гульні Ілья Мурашка ўсё ж адыграў адзін мяч, але для таго, каб выраўняць лік, у футбалістаў “Райспажыўтаварыства” ўжо не было часу. У выніку фінальны свісток арбітра зафіксаваў мінімальную перамогу “Будаўніка — ПМК-14” з лікам 2:1.

Уладзімір САКАЛОЎ.

НА ЗДЫМКУ: каманда-пераможца “Будаўнік — ПМК-14”.

Фота

Віталя ГЕРАСІМЕНІ.