Свята працаўнікоў сяла

У мінулую суботу ў Ляхавічах прайшоў абласны фестываль-кірмаш працаўнікоў сяла “Дажынкі-2013”, на якім пабывала і дэлегацыя Ганцаўшчыны на чале са старшынёй райвыканкама Аляксандрам Саланевічам.

Сёлетні год, у параўнанні з мінулым, выдаўся не надта багатым на ўраджай. У першую чаргу гэта звязана з неспрыяльнымі ўмовамі надвор’я. Аднак, нягледзячы на гэта, Брэстчына па-ранейшаму застаецца ў лідарах па вытворчасці сельскагаспадарчай прадукцыі. На гэтым у сваім выступленні падчас урачыстага адкрыцця фестывалю-кірмашу акцэнтаваў увагу кіраўнік вобласці Канстанцін Сумар.

Сёлета хлебаробамі Брэстчыны намалочана 1 мільён 70 тысяч тон збожжа пры сярэдняй ураджайнасці 31,5 цэнтнера з гектара. Больш за тысячу тон намалацілі 243 экіпажы вобласці. Прыемна, што ўжо на працягу некалькіх гадоў агульны намалот збожжа перавышае паказчык у 1 мільён тон. Аднак, па словах губернатара, ужо ў бліжэйшы час трэба імкнуцца да лічбы ў 1,5 мільёна тон збожжа.

Падчас свайго выступлення Канстанцін Сумар таксама адзначыў раёны і лепшыя гаспадаркі, якія плённа папрацавалі і ўнеслі значны ўклад у сёлетні ўраджай. Сярод раёнаў лепшым стаў Пружанскі, сярод сельскагаспадарчых арганізацый — СВК “Дарапеевічы” Маларыцкага раёна.

Пасля выступлення Канстанцін Андрэевіч узнагародзіў лепшых хлебаробаў Брэстчыны. Прыемна, што сярод пераможцаў абласнога спаборніцтва на жніве-2013 аказалася і прадстаўніца нашага раёна. Першае месца сярод аператараў збожжасушыльных комплексаў заняла Таццяна Іванаўна Ваўчок  з СВК “Хатынічы”.

Падчас свята ўзнагароды атрымалі і іншыя прадстаўнікі Ганцаўшчыны: камбайнеры СВК “Агарэвічы” Аляксандр Курс і Аляксандр Грыбоўскі, а таксама вадзіцель СВК “Дубнякі” Віктар Сянько.

Сярод шматлікіх ганаровых гасцей на свяце прысутнічаў і намеснік міністра сельскай гаспадаркі і харчавання Беларусі Васіль Паўлоўскі. У сваім выступленні ён паведаміў прыемную навіну. Літаральна некалькі дзён таму былі падведзены вынікі рэспубліканскіх “Дажынак”, якія пройдуць напрыканцы верасня ў Жлобіне, і пераможцай у іх стала Брэсцкая вобласць.

Па заканчэнні афіцыйнай часткі фестывалю-кірмашу пачаўся святочны канцэрт з удзелам лепшых калектываў аматарскай творчасці і асобных выканаўцаў Брэсцкай вобласці.

Святкаванне абласных “Дажынак” адбывалася не толькі на галоўнай сцэне на плошчы, але і на шматлікіх святочных пляцоўках, якія размясціліся ў розных кутках Ляхавіч. Вялікае ўражанне на гасцей пакінула выступленне самадзейных артыстаў Ганцаўшчыны, у прыватнасці жанчын з народнага фальклорнага гурта “Хатовічы”, у адрас якіх прагучала нямала апладысментаў і слоў удзячнасці. Карысталіся вялікай папулярнасцю і гандлёвыя кропкі Ганцавіцкага райспажыўтаварыства.

Падчас свята на мясцовым стадыёне “Колас” праходзілі разнастайныя спартыўныя спаборніцтвы, у розных кутках горада ладзіліся шматлікія конкурсы і гульні, працавалі выставы майстроў народнай творчасці, гандлёвыя кропкі, дзейнічалі дзіцячыя атракцыёны і інш. Завяршылася свята працаўнікоў сяла святочным феерверкам.

Уладзімір САКАЛОЎ.