Участковыя павінны больш працаваць на месцах і з насельніцтвам

У райвыканкаме адбылася сустрэча старшыні раённага выканаўчага камітэта Аляксандра Саланевіча з кіраўніцтвам РАУС і ўчастковымі інспектарамі міліцыі. На яе таксама былі запрошаны намеснік старшыні райвыканкама Сяргей Сарокаў, пракурор раёна Сяргей Насеня, кіраўнікі аддзелаў райвыканкама і старшыні сельскіх Саветаў.

На пачатку сустрэчы Аляксандр Саланевіч звярнуў увагу на, бадай, галоўную праблему нашага грамадства — п’янства. Прычым п’янства на рабочых месцах. Асабліва актуальнай гэтая праблема становіцца ў дзень атрымання работнікамі заработнай платы. “Людзі нікога не баяцца і адчуваюць сябе беспакаранымі, — адзначыў кіраўнік раёна. — У мінулым годзе ў барацьбе з п’янствам назіраліся станоўчыя зрухі, але цяпер зноў гэта праблема  ў ліку надзённых. На жаль, я пакуль не бачу ўплыву міліцыі на дадзеную сітуацыю. Так быць не павінна”.

Знаёмячы прысутных з дзейнасцю ўчастковых інспектараў, намеснік начальніка РАУС Аляксей Крысюк расказаў, што на сённяшні дзень штат участковых інспектараў амаль поўнасцю ўкамплектаваны, але яшчэ адносна нядаўна назіраўся іх недахоп, таму і ўзнікалі некаторыя праблемы. Дзякуючы кіраўніцтву РАУС, усе ўчастковыя інспектары, хто мае ў гэтым патрэбу, атрымалі службовае жыллё і транспарт. Аляксей Аляксандравіч прадставіў прысутным кожнага ўчастковага. У пераважнай большасці гэта маладыя супрацоўнікі, якім яшчэ не хапае вопыту, каб вырашаць тыя ці іншыя пытанні на належным узроўні.

Аднак галоўнай праблемай, па меркаванні старшыні райвыканкама, з’яўляецца тое, што ўчастковыя недастаткова часу праводзяць на сваім участку, мала ўвагі надаюць рабоце з людзьмі і супрацоўніцтву са старшынямі сельскіх Саветаў. З гэтым пагадзіліся і самі кіраўнікі сельвыканкамаў. Дарэчы, з іх вуснаў гучалі таксама словы падзякі ў адрас міліцыянераў. Асабліва была адзначана работа інспектара інспекцыі па справах непаўналетніх РАУС Вольгі Мелехавец, якую старшыня райвыканкама прывёў у прыклад участковым інспектарам.

Разглядаліся на сустрэчы і іншыя надзённыя пытанні, звязаныя з дзейнасцю праваахоўных органаў. Так, прапанавана звярнуць асаблівую ўвагу на двор каля дома № 3-а па вуліцы Будаўнікоў, які стаў па-сапраўднаму праблемным месцам. Яшчэ адной праблемай з’яўляецца тое, што некаторыя жыхары шматпавярховых дамоў пакідаюць свае транспартныя сродкі на травяных газонах і ў неўстаноўленых месцах. Супрацоўнікам міліцыі, па словах намесніка старшыні райвыканкама Сяргея Сарокава, трэба ўзяць гэта пытанне на кантроль.

З пачаткам навучальнага года стала актуальнай і праблема, якая назіралася ў мінулым годзе: бацькі па-ранейшаму падвозяць сваіх дзяцей ледзь не пад самы ганак устаноў адукацыі (такі малюнак назіраецца ля гімназіі, СШ № 1, СШ № 3, Хатыніцкай СШ), тым самым груба парушаючы правілы дарожнага руху і падвяргаючы рызыцы здароўе і жыццё дзяцей. На гэта праваахоўнікам неабходна таксама звярнуць пільную ўвагу.

Напрыканцы сустрэчы былі падведзены яе вынікі. У прыватнасці, адзначана, што ўчастковыя інспектары павінны больш працаваць на месцах, непасрэдна з людзьмі і ў цесным узаемадзеянні са старшынямі сельскіх Саветаў. Хочацца спадзявацца, што з цягам часу маладыя ўчастковыя стануць больш упэўненымі ў сабе, і нараканняў да іх работы будзе значна менш.

 

Уладзімір САКАЛОЎ.